UTS Flow, Curacao - Zwangerschapsverlof

Empleadonan di FLOW i UTS ta benefisiá di pólisa nobo di Liberty Latin America pa ferlòf di mayornan

16 SIMAN PAGÁ PA MAMANAN I 8 SIMAN PA TATANAN

Willemstad, Kòrsou, Ougùstùs, 2019  Kompanianan lokal di telekomunikashon Flow i UTS a revelá un pólisa di ferlòf di paternidat pionero pa tur empleado full time. Riba promé di yüni último esaki a ser introdusí ofisialmente i awor empleadonan di Flow i UTS ta entusiasmá ku e benefisio aki di 16 siman ferlòf di embaraso’ (‘zwangerschapsverlof pagá’) i 8 siman ferlòf pagá pa tatanan. Na Kòrsou tatanan ta risibí solamente 5 dia di ferlòf despues di nasementu di nan yu(nan). Pues, esaki ta nifiká un kambio signifikante den e kontribushon pa engrandesé e laso familiar durante e periodo speshal aki pa nos empleadonan i nan famia. Mamanan ku ta den espera ta haña awor 2 siman adishonal riba e 14 simannan ku nan tin derecho riba dje.

E pólisa nobo aki ku a ser kreá pa kompania mama Liberty Latin America, lo proveé e ferlòf di mayor(nan) na tur empleado despues di nasementu di un yu. “Kambia nos pólisa di ferlòf di mayor(nan) ta simplemente e lokual ta korekto pa hasi”, asina señora Kerry Scott, Chief People Officer di Liberty Latin America, a indiká. “Nos ta rekonosé ku diversidat ta empuhe pa éksito i ku e dinámika di famia i strukturanan mester kambia. Nos pólisa ta demostrá nos dedikashon na un kultura di diversidat i inklushon i unu ku ta pone nos hendenan na kurason di nos éksito.”

Señor Nicolas Collette, Southern Caribbean VP pa Cable and Wireless, a yama bon bini na e pólisa nobo aki i a deskribí esaki komo unu di gran importansia pa e kompania. “Komo un lider den komersio, mi ta sumamente orguyoso ku nos a introdusí un pólisa asina inovativo i progresivo. Mi mes komo tata sa e balor di krea momentunan speshal ku bo resien nasí. Pues mi ta orguyoso di ta parti di un organisashon ku di bèrdat ta balorá su hendenan”, asina el a splika.

Señor Collette a kontinuá: “Di mes manera ku nos ta krea momentonan di importansia pa nos klientenan, asina tambe nos ke pa e miembronan di nos tim disfrutá di e momentunan speshal den nan mes bida. No tin nada mas speshal ku nasementu di un yu. Ta inisiativanan manera esaki ta demostrá e kultura úniko di e kompania. Tin masha hopi investigashon ku a ilustrá kon benefisioso e ferlòf di mayor(nan) pagá aki ta pa no solamente e mayornan, pero tambe pa e muchanan, komunidat den su totalidat i kompanianan.”

Empleadonan di Flow i UTS ya kaba ta benefisiando di e pólisa nobo aki. Señor Roderick Martina, kende ta e promé tata den e kompania aki ku ta benefisiá di e inisiativa a indiká: “Mi ta hopi kontentu ku e kambio di e pólisa di 5 dia pa 8 siman. Komo tata mi ta entusiasmá pa por pasa mas tempu ku mi yu muhé Thazjëana.”

Bron: UTS

Notisia

Laga Bo Komentario Atras

This site uses Akismet to reduce spam. Learn how your comment data is processed.