Inspirational Mondays: Bo Talentonan ta Deseá
Esaki ta e prome edishon di Inspirational Mondays. Esaki ta un serie kaminda nos lo komparti un quote inspirashonal tur Djaluna ku bo. E quotenan aki ta pa inspira abo den bo trabou òf den bo buskeda di un trabou nobo. Mi ta spera ku bo ta disgruta di dje…
Bo por ta buskando trabou pa algun siman kaba, kisas bo tin lunas of mas ku 1 aña ta buska un trabou. Esaki ta un situashon basta fèrfelu, den kua desafortunadamente, hopi hende a haña nan mes den dje.
Solisitá no tur bia ta duna un kontesta satisfaktorio di e departamentu di rekursonan humanodi e organisashon kaminda bo a solisita. Esaki por pone ku bo ta pèrdè speransa òf pio ainda, bo por pensa ku bo talentonan ta enbano. I ku bo no por ofrese niun hende nada riba tereno profeshonal. Pero esaki naturalmente no ta bèrdat.
E quote ku mi ta trese pa bo awe, ta di Louise Hay, esaki ta speshal pa abo ku ta den e situashon diskribi akiriba. Paso nos no ke pa bo pèrdè speransa. Pasobra, den palabranan di señora Louise Hay, ‘Somewhere someone is looking for exactly what you have to offer.’
Na Papiamentu e ta nifika, ‘Un kaminda tin un hende ku ta buskando nèt loke abo tin di ofresé.’
Ku e konosementu aki, e motivashon pa sigui duna tur loke bo tin pa bo logra bo meta mester ta grandi.
Desempleo ta haltu na Kòrsou
Na Kòrsou nos tin un sifra di desempleo di masomenos 11.7%. Esaki ta nifika ku tin 8200 persona ku meskos ku abo, ta buskando un trabou.
Imagina bo ku 10% di e hendenan aki (820 persona), ta buskando trabou den mesun direkshon ku abo ta buskando. I imagina bo ku mitar di e grupo aki ta reakshonando riba mesun vakaturanan riba kual abo ta reakshona. E persona ku ta buskando presis loke abo tin di ofrese, porta lo tin ku pasa den 409 cv prome ku e topa ku esun di bo. Bo por imagina bo ku bo cv porta no ta hala atenshon den tur e cv-nan aki. Pa e motibu aki bo tin ku sòru pa bo cv ta hala atenshon.
Ser proaktivo, yama e organisashon si bo no tende nada di bo solisitut. Di e manera aki bo ta mustra ku di bèrdat bèrdat bo tin interes den e vakatura. Esaki ta mustra tambe ku bo ta dispuesto na tuma e pasonan nesesario pa bira e kandidato ku finalmente ta haña e trabou. Esaki ta hasi bo chèns ku nan ta konsidera bo seriamente tambe.
Esaki tabata e prome edishon di Inspirational Mondays. Bisa mi, kiko bo ta pensa di dje? Laga bo komentario den e sekshon akibounan. Nos gusta komunika ku boso!