5 Motibu Pakiko Bo No Ta Haña Kontesta Ora Bo Solisitá
E senario aki por parse bo konosi; Bo tabata buska i bo a haña un vakatura ku ta pas presis ku bo kapasidat i eksperensia. P’esei bo ta sòru di hinka sufisiente tempu den bo karta di solisitut. Paso esun aki si no mag pasa bo voorbij. Bo ta kue bo CV tambe i drecha esaki un tiki pa hala mas atenshon. Yen di entusiasmo bo ta manda bo karta pa e dunadó di trabou ku segun bo, ta buskando un hende manera abo.
Tur dia bo ta kontrola bo email wak ku bo no a haña niun kontesta. Tur dia di nobo bo ta wòrdu defrouda pa e ousensia di un kontesta di e dunadó di trabou. Dos siman ta pasa sin ainda bo haña niun kontesta, pero bo no ke pèrdè animo. B’a kòrda ku porta e kontesta por a bini den bo spamfolder i bo ta kontrola esaki tambe. Pero ketu, nada, niun kontesta akinan tampoko. Despues di un luna warda, s in ningun kontesta, bo a kumisa asepta ku e kontesta ei lo no bini mas.
Asinaki tempu a pasa sin niun reakshon di parti di e doño di trabou riba bo solisitut. Tur e esfuerso di bo parti tabata pornada.
Esaki ta e realidat di hopi buskado di trabou. Anto no ta un kos lokal esaki ta, ta un realidat amargo ku buskadonan di trabou ront mundu ta hañanan konfronta kune.
Segun un enkuesta di 2013 hibá pa CareerBuilder na Merka, 75% di solisitantenan no a haña kontesta riba un of mas solisitut. Esaki ta pa ilustra ku no ta abo so tin e problema aki.
E dunadó di trabou por tin su motibunan pakiko e no a kontesta abo i otronan. Mi no ke papia e kos goed, paso esei ta imposibel i no ta nèchi.
Akibounan tin 5 motibu pakiko tin bi abo no a haña kontesta di e dunadó di trabou.
- Bo no a lesa e vakatura bon.
E punto aki por ta klòp den sierto kaso. Bo ta asina entusiasma ku bo no ta lesa tur e demandanan of bo a faya un punto den e prosedura. E dunadó di trabou den e kaso aki por disidi di no ni kontesta bo i dedika su tempu na un hende ku si a lesa e informashon ku mas atenshon.
- E vakatura no ta disponibel mas/ E vakatura ta bieu
Si bo ta solisita riba vakaturanan online, no ta semper bo por mira e fecha ku e vakatura a wòrdu publika. I si huntu kune, no tin un fecha duidelijk pa bo reakshona, por pasa ku bo ta reakshonando riba un vakatura ku ta bieu kaba. Tin chèns ku e posishon ta asta yená kaba. Un departamentu di HR lo no ke dedika muchu tempu kontestando email ku ta bini komo reakshon riba vakaturanan bieu. Pa e motibu aki, e dunadó di trabou por pone un deadline pa su vakatura riba Werk ze! Despues di e fecha aki, lo bo no por solisita mas riba e vakatura via di nos website. Esaki ta evita ku bo ta solisita riba vakatura bieu riba nos website i ta spar abo i e dunadó di trabou tempu. Paso bo tempu ta balioso i preferiblemente lo bo ke huz’é riba vakaturanan ku sí ta disponibel ainda.
- E departamentu di HR ta muchu drùk
Na kompanianan mas chikitu, e departamentu di HR ta hopi chikitu. Tin kompania ku no tin esaki mes. Ora un kompania asinaki pone su vakatura disponibel, esaki port rese hopi mas reakshon ku nan a verwacht. Esaki na su turno ta pone ku nan no tin tempu pa pasa den tur karta, no pensa mes di kontesta tur. Imagina bo bo tin ku pasa den dosshen karta i CV I alabes bo tin ku kumpli ku bo trabou diario. E situashon aki ta poko fèrfelu pa deal kun’é.
Pa abo komo buskadó di trabou e situashon aki por ta hopi fèrfelu, paso tin bia e dunadó di trabou nota ni haña chens di pasa den bo solisitut, kual ta pone ku porta bo no ta haña kontesta di nan.
Mi ta kòrda kon un organisashon akinan na Kòrsou a yega di pone Open Dag pa nan rekruta hende nobo. E fluho di hende ku a baha riba e organisashon tabata muchu. Un par di shen hende a bishita e evento aki, tabatin hende ku a haña kontesta 10 luna despues di a yena nan formulario. Sikiera ela haña un kontesta, pero 10 luna si ta poko dimas pa sinta warda riba un dunadó di trabou, kon leuk e trabou por ta (parse).
- Bo no tin pasenshi
Na Kòrsou, mi ta papia over di Kòrsou, paso mi no tin eksperensia ku e otro islanan, pero nos tin e kustumber ku tur kos ta bai mas slow akinan. Esei sigur sib o kompar’é ku sierto instansianan na Hulanda por ehèmpel. Si bo a pasa den e proseso di buska trabou einan, lo bo a kustuma ku bo ta haña un kontesta den un pa dos siman. Maske esaki porta ta un kontesta outomatiko. Na Kòrsou no tur bes esaki ta sosode of e ta tarda. Dus loke bo por hasi ta tene un tiki mas pasenshi ku normal si bo ta buskando trabou na Aruba, Boneiru, Kòrsou, Saba, Sint Eustatius of Sint Maarten.
Tambe ta bon pa bo bèl e dunadó di trabou despues di un siman pa wak si nan a risibi bo karta. Tene kuenta si ku pa un kompania chiki, por ta mas difisil pa keda atende telefòn so di e manera aki.
- Bo no ta kualifika
Si! Bo CV por ta impreshonante, pero porta net nò pa e trabou aki. Porta bo ke traha persé fulltime, kaminda e vakatura ta pa un trabou parttime. Of bo a kaba di reakshona riba vakatura pa un piloot na KLM, kaminda ta fli so ba yeg’i subi den bo bida. Den e kaso aki sigur, lo bo tin kurashi di verwagt un kontesta (serio).
Naturalmente, por tin eksepshon
Den un kombersashon ku agun organisashon, mi a ripara ku no ta tur dunadó di trabou ta keda sin kontesta kandidatonan ku a reakshona riba un vakatura serka e dunadó di trabou. E dunadó di trabou spesifiko aki a splika mi kon nan ta hasi nan bèst pa nan reakshona riba tur karta. Asta esnan ku ta bin via pòst ta haña nan debido atenshon.
Si e kandidato no tin un emailadres, nan lo asta pòst nan kontesta pa e kandidato si ta nesesario. Esaki ta mustra ku kontesta tur kandidato ta posibel, maske ku e ta eksigi un poko mas esfuerso. Buskadonan di trabou lo keda kontentu ku sikiera nan a haña un kontesta, maske esaki ta negativo.
Awor ta kiko bo tin ku hasi si bo no haña kontesta?
Un kos ku sigur bo no tin ku hasi, ta laga e situashon aki desanimá bo. I kòrda bon, ku no ta bo falta. No laga e falta di kontesta di e kompania stroba bo di sigui solisita na otro kaminda. Regularmente tin vakaturanan disponibel, i di bo tambe ta den nan. P’esei mes, check nos pagina di vakatura regularmente pa posishonnan ku ta interesante pa bo.
Pero awor, konta nos. Bo a yega di eksperensiá un situashon mas frustrante ku solisita i keda sin haña kontesta?